今日食飯講起一個話題, 就係"越大越怕死"嘞! 其實我都好同意呢句說話, 因為我發覺我都係咁, 人越大越多野唔敢試, 唔敢做.
朋友都知我唔玩機動遊戲, 又唔會睇鬼片, 就好似佢地今日講起下個月既海洋公園"哈囉喂", 我就一定唔會去嘞, 因為我既格言係"仲乜要俾錢人哋去嚇自己啫!" 當然啦, 好多人會覺得好好玩既. 不過點先引證到"越大越怕死"呢個心態呢? 大家講起細個既時候都比宜家大膽得多, 什麼危坐欄杆, 倒頭"sir"滑梯呀, 宜家根本無可能, 一嚟宜家人大咗唔會再咁儍, 二嚟真係怕"死"嘛, 細個都唔知"死"字點寫, 而且人大咗, "擁有"既嘢都多咗, 邊有咁灑脫呀.
其實除咗"玩", 做其他野亦都會越嚟越小心, 識個朋友, 轉份工都可能會諗多好多, 因為人大了, 係呢個社會打滾得耐咗, 開始唔會再咁容易相信人, 思想開始複雜, 開始會計較, 開始怕"死". 最近跟一個好幾個月沒見的朋友踫面, 談及佢既近況, 我真係好佩服佢, 因為佢離開咗一間做咗成十年既公司, 而且更加係轉行, 轉去一份全新既工作. 佢完全無新工作嗰行既經驗, 而且薪金比舊既要低很多很多, 要靠commission, 所以都唔知要捱幾耐, 佢亦唔係家境富裕, 相反佢仲要負擔屋企, 佢更加唔係十八, 廿二, 雖然絶不能說得上"老", 但已絶對不是可以咁瀟灑轉公既年紀(起碼我覺得係), 但就係因為佢覺得人生是需要見識一下其他野的, 所以佢毅然放下已擁有既, 去嘗試新事物.
我欣賞佢, 亦羨慕佢, 雖然我學唔到佢, 因為我有太多身外事要顧, 而我既性格亦唔同佢, 不過我都好認同佢既決心, 反正, 佢雖然處係一個重新起步既階段, 不論心理上或者經濟上都受緊唔少壓力, 但同時卻都得著不少, 起碼在佢嚟講, 佢認為自己係賺咗嘞. 呢種打破"越大越怕死"既心態是令人羨慕既, 衷心希望佢成功!
全站熱搜
留言列表
