麥記早餐好唔好味就見仁見智, 不過我就好奇怪, 雖然唔覺得特別好食, 但總係鐘意係放假既時候去食番個"麥香餅早餐", 感覺好......有味道, 嘻嘻! 
不過今朝為咗食老麥就真係幾勞氣......
不過今朝為咗食老麥就真係幾勞氣......話說今朝瞓到十點, 一心諗著要食早餐, 所以就的起心肝起身梳洗, 攪完一輪之後落樓其實都有啲趕, 因為老麥早餐做到十一點架咋! 我趕到落去約莫10:45, 排隊既人唔算好多, 但每行都有兩三個人, 我就求其揀了一行排隊嘞. 點知等吓又等吓, 我條隊都唔多郁, 見狀都有啲心急, 點知等咗10分鐘後就見啲職員轉餐牌嘞, 跟著又開始聽到有人話無早餐賣啦喎, 心諗: "唔係呀! 專程走落嚟食早餐, 等咗咁耐先話無?! 未夠鐘喎!"....... 終於到我嘞, 眼看那時剛好差一, 兩分鐘就11:00點, 我都即時問收銀係未無晒早餐賣, 佢就答我"係", 我當然好唔憤氣啦, 話晒都等咗成15分鐘喎, 宜家你先同我講話無得賣, 啱啱夠11點咋喎! 但個收錢好似完全無反應咁, 又唔理我, 連我買唔買其他野都無問, 我俾佢既態度真係激到彈吓彈吓. 我見咁樣都無心機買第二樣野食嘞, 但度氣又就真係唔多落到喎, 因為都唔係第一次咁架喇, 不過今次個收銀既態度先令我最唔抵得啫. 之後我企埋一邊想打電話, 點知竟然比我聽到另一個收銀繼續賣早餐俾個客喎, 嘩! 攪錯呀, 又話無晒既! 我忍唔著未即刻問佢點解仲有得賣囉, 我話要投訴.......好在這個收銀好好多, 即時叫咗個經理過嚟問我咩事, 我就同佢表逹咗我既不滿啦, 之後佢終於都係補做番個"麥香餅早餐"俾我.
或者會有人覺得我小事化大既, 不過係嗰刻我真係唔知點解好鬼嬲囉, 晨早溜溜, 打算食個早餐, 然後回家博殺做埋我份黑人憎既功課架嘛, 俾佢咁樣窒一窒, 又難怪我勞氣咗啲既. 今日屋企人全部出晒街, 真係個大好時刻做功課架, 希望順順利利攪掂埋佢啦! 
全站熱搜
留言列表
