很久沒有update個blog啦, 因為真係太忙太忙啦, 不論工作, 學業, 連放工既時間都好似排得密密麻麻咁, 生活好似一下子變得好充實, 時間變得唔夠用, 不過時時都有節目, 時時都咁忙, 有時都會覺得幾攰架!
最近其實有好多事情想記低, 但因為無時間, 好多事過去咗就擱下來, 印象就變得模糊, 不過最近最頻密既"節目"都算係"食飯"嘞! 當然唔係講每日都要食既Lunch同Dinner啦, 而係同朋友特別約定既飯局, 而且近幾次去吃嘢既地方都係無去過既.
大埔林邨食西餐 ------> 沙田酒吧飲嘢 -------> 深水埗食糖水
因為同學有車, 所以就揀咗去大埔林邨食晚飯, 即係許願樹附近. 許願樹聽就聽得多嘞, 但我就從來未去過, 不過嗰棵樹係現場睇一啲都不似電視睇到咁樣, 好似矮好多(可能係夜嘛嘛, 睇唔清楚啦). 不過嗰間西餐廳真係唔錯, 我哋食咗出名既焗牛膝, 鵝肝醬豬扒焗飯, 龍蝦湯..........等等, 宜家諗起都仲有啲流口水呢! 不過價錢都唔平, 仲要有好幾個人去食先可以, 否則好難試到唔同既菜色. 值得一提既係除咗間餐廳外, 就係嗰個係附近既"全港至貴公厠"嘞 (同學仔講既), 從外表睇真係睇唔出佢係一座厠所呢! 我當然有入去參觀參觀啦, 還專登影咗幾張相呢~ (當然係係門口拍啦, 係入面拍容乜易俾人誤會架)
有時有車就係有呢個好處, 可以想去邊就去邊(當然係唔駛自己養就咁講啦). 我哋食飽飽就到咗沙田飲嘢, 估不到我個同學仔載了我哋去沙田麗豪酒店嗰間BAR, 因為我係沙田做嘢, 好多時開完會都會去嗰到既中菜廳食lunch, 質素不俗呀! 不過就未去過嗰到間BAR飲嘢, 其實佢裝修唔錯, 但係人就少得可憐, 起初去到仲以為我哋包場添, 真係唔知佢點樣維生.
最後一站係到深水埗食糖水, 呢度我未嚟過, 到達時見門口好多人等位, 對佢自然有啲期望, 不過最後就變成失望嘞, 因為真係麻麻地, 無乜特別. 不過今日能夠去晒新界九龍都幾好呀, 夠晒行程緊湊.
長洲吃海鮮
都係同一班同學仔, 今次為幫其中一個人慶祝生日, 所以有人提出別出心裁既建議, 就係入長洲食海鮮嘞! 講真海鮮無乜特別, 埋單亦唔係特別平, 總括一句就係"去過就算嘞, 無第二次囉", 反而之後到咗一間甜品店食甜品, 就有一樣幾特別, 味道都OK, 好像叫做"芒果湯圓", 是一粒粒透明的丸子, 中間藏著少許芒果肉的, 幾好味.
富貴大閘蟹
今年第一次食大閘蟹(不過應該都係食一次吧, 因為咁貴自己都唔會去食啦), 而地點好特別, 就係去老闆屋企嘞(不過係老闆娘邀請既). 我去過兩次, 第一次係去充當"老闆仔"既中文輸入法老師, 今次就係同一班同事一齊去. 嗰度真係一所"豪宅"呵 ~ 共三層, 好似話有過萬尺, 是間獨立屋, 一間房分分鐘有我屋企咁大呢! 裝修方面, 老闆娘話用咗一整年時間, 都睇得出係專人設計既, 出嚟既效果真係不俗. 講番大閘蟹, 我本身不係特別喜愛, 不過有得食就當然開心啦(仲要係免費嘛, hehe...) 每人食兩隻都飽晒啦, 因為好大隻, 加上有其他海鮮, 呢晚真係食得好飽.
泰色新口味
今次飯局係同另一班舊同學係幾個月前約定既, 而且今次由我負責聯絡, 咁啱呢排又好忙, 所以約人真係有啲難度. 今次食飯既地點係一早定下, 在佐敦倫敦廣場的"泰屋", 這裡裝修和食物都不錯, 我哋都食得好滋味, 嗰度既"生蝦"好新鮮, 醬汁都好好味, 鐘意食生嘢既就幾好嘞, 不過最麻麻既係嗰個"南瓜布丁", 又細件, 又無乜南瓜味.
一口氣寫咗咁多"食食食......", 想起都有啲肚餓呢, 去食飯先! 
全站熱搜
留言列表
